កណ្ដាល៖ នាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត ថាបានជំរុញភាពខ្លាំងរបស់ប្រជាជាតិតាមរយៈការចូលរួមជាស្មារតីសាមគ្គីជាតិជាធ្លុងមួយ។ សម្ដេចបានលើកឡើងឧទាហរណ៍ពីការចូលរួមគាំទ្រការសាងសង់ព្រែកជីកហ្វូណនតេជោដែលបានបើកការដ្ឋាននៅព្រឹកថ្ងៃទី៥ ខែសីហា ឆ្នាំ២០២៤នេះ។

ថ្លែងនៅក្នុងពិធីបើកការដ្ឋានសាងសង់ព្រែកជីកហ្វូណន់តេជោ នៅឃុំសម្រោងធំ ស្រុកកៀនស្វាយ ខេត្តកណ្ដាល ព្រឹកថ្ងៃទី៥ ខែសីហា ឆ្នាំ២០២៤ សម្ដេចធិបតី ហ៊ុន ម៉ាណែត បានលើកឡើងថាបើ ខ្មែរបាត់បង់មោទនភាព បាត់បង់សាមគ្គីភាពជាតិ បាត់បង់នូវស្មារតីជាតិនិយម វានឹងធ្វើឲ្យខ្មែរទន់ខ្សោយ។ សម្ដេចបានលើកឡើងពីការដួលរលំនៃសម័យអង្គរដែលធ្វើឲ្យខ្មែរបែកបាក់សាមគ្គី ហើយទម្រាំតែអាចកសាងបានដូចពេលបច្ចុប្បន្នគឺប្រើពេលយ៉ាងយូរ។

សម្ដេចជឿថាការសម្រេចបាននូវការសាងសង់ព្រែកជីកហ្វូណនតេជោនេះគឺជាចំណុចចាប់ផ្ដើមនៃការរួបរួមសាមគ្គីជាតិខ្មែរឡើងវិញ។

សម្ដេចធិបតីសន្យាធ្វើអ្វីគ្រប់យ៉ាងដើម្បីរក្សាសន្តិភាពជាតិនិងធ្វើឲ្យជាតិរួមគ្នាជាធ្លុងមួយ និងការអភិវឌ្ឍប្រទេសឲ្យរីកចម្រើនរុងរឿង៕